Banco Español Filipino
Una itong tinawag na El Banco Español de Filipinas de Isabel II. Mula ang pangalan sa ina ng hari ng Espanya noon na si Haring Alfonso XIII. Ito ay naitatag 23 taon pagkaraang ideklara ni Haring Ferdinand VII ang pagtatatag ng isang pampublikong bangko sa Filipinas.
Ang pangunahing gawain ng mga bangko sa bansa noon ay limitado lamang sa mga gawaing pampubliko o obras pias. Subalit sa paglago ng kalakalan sa bansa, nagkaroon ng malaking pangangailangan sa pera at pagpapautang.
Layunin ni Haring Ferdinand VII na pataasin ang komersiyo at kalakalan sa bansa sa pamamagitan ng bangkong ito. Pormal na nag-umpisa ng operasyon ang bangko noong 1852 at ito lamang ang may ekslusibong pribilehiyo na makapaglabas ng perang papel noong 17 Oktubre 1854.
Ang tawag sa unang inilabas ng perang papel ng bangko ay pesos fuertes o malakas na piso. Ito ay may denominasyong mula 10 hanggang 200 piso. Maaari itong ipalit sa Mehikanong sensilyong ginto at pilak.
Ang unang opisina ng bangko ay nasa Casa de la Aduana Real na tinawag ding Intendencia sa loob ng Intramuros. Ito ay pinamahalaan ng dalawang halal na tagapamahalang direktor na nagpapalitan kada taon. Ito ang unang bangkong nagpautang sa pamahalaan para sa pagpapatayo ng isang pampublikong pamilihan.
Pinaikli ang pangalan ng bangko noong 3 Setyembre 1869 at tinawag itong El Banco Español de Filipinas pagkaraang mapatalsik sa kaniyang trono si Reyna Isabel II noong 1868.
Subalit noong 1 Enero 1912, pinalitan ito ng pangalan upang mawala ang anumang koneksiyon ng bangko sa Espanya. Tinawag na itong Banco de las Islas Filipinas o Bank of the Philippine Islands. Ang unang sangay nito ay binuksan sa Lungsod Iloilo.
Sa kasalukuyan, ito ang bangkong may pinakamaraming parangal na natanggap. Noong 2005, 2006, at 2008, ginawaran ito ng The Banker bilang pinakamahusay na bangko sa Pilipinas.
Pinagmulan: NCCA Official | Flickr
Mungkahing Basahin:
No Comment to " Banco Español Filipino "